قصة واحد سمى نفسه .. نكد (شعبيه)

[محايد1]

نــــــــــــــــكــــد

كان يا ما كان ...

يا سعد يا كرام .. ما يطيب الحديث إلا بذكر النبي عليه أفضل الصلاة والسلام

كان في واحد قاضي .. كل ما جاله صبي يشتغل عنده يشرط عليه
وان انته زعلتني تقطع لي خشمي . وان أنا زعلتك أقطع لك خشمك
وما حد قبل الشرط الا واحد صبي اشتغل عنده لمدة إلي أن أراد الله بما
أراد والصبي زعل من القاضي فقطع له خشمه وخرج الصبي من عنده
ودمه يسيل .. وراح علي بيت أخوه اللي اسمه سعيد . ولما شاف دمه
سايل وعرف منه شرط القاضي اللي قبله أخوه الطيب صمم ينتقم له
وتركه في البيت وحلف ما يرجع إلا بخشم القاضي في يده ..

وأخذ سعيد بعضه وراح للقاضي وعرض عليه انه يشتغل عنده
فسأله القاضي : أنت اسمك ايش ؟
رد سعـــيـد : أنا اسمي نـــكــد
قال القاضي : أنا فعلا محتاج صبي يشتغل عندي لكن أنا شرطي الأول
.....والأخير انك لو زعلت مني يا نكد اقطع لك خشمك , ولو زعلت
انا منك تقطع لي خشمي
وافق سعيد علي الشرط وهو ناوي يغلغل القاضي وينكد عليه عيشته ويأخذ
بتار أخوه المسكين .
واعتمد القاضي علي نكد في تنظيف الجنينة والعناية بالزرع لكن نكد كان
مهمل وماهو مهتم بالاشجار اللي بدأت تضعف والورود اللي دبلت والحشيش اللي صفر . انزعج القاضي من منظر الجنينه وزهم علي الصبي

القاضي : ايش هادا يا نكد ؟ الجنينه كلها زرع ميت , انته ماتخلي بالك وتنتبه
نـــــــكــــد : يا عمي الجو الجو حار والمويه قليل وانا ما بيدي حــيله
القاضي : الجو طول عمره حار والمويه مقاسها واحد .. مافي جديد الا انت
رد نــكد : صوتك عالي يا عمي وأظنك زعلان !
قال القاضي : بسرعة : أنا ؟ ابدا ماني زعلان

وكان في الجنينه كلب كبير يحرس البيت والقاضي يعزه كتير .. وكل يوم تعطي
الجاريه صينية الاكل الخاصة بالكلب لنكد عشان يأكله
ويشوف نكد الأكل ويقول في نفسه : يعني الكلب يا كل دجاج ولحمه وادام .. وانا
البني ادم يعطوني ما شاح وما لاح .. صار ياكل الاكل حق الكلب ويتركه جيعان ..
ويوم ورا يوم ضعف الكلب وهزل والقاضي يسأله عن السبب ونكد عامل نفسه ماهو
عرف العلة الي أن صار الكلب يزحف علي بطنه وبعد شوية مات .. وصار القاضي
حزين علي كلبه الوفي ومتحسر علي موته

قال لنكد : يا تري ايش اللي جري للكلب ؟ والله كان من احسن مايكون لحد ما جيتنا
انت وصار اللي صار
رد نكد : يمكن ما كان بيتغذي طيب ,
قال القاضي : ما بيتغذي ؟ ده اكله كله لحمة ودجاج
قال نكد باستغراب : هو اللحم والدجاج كان للكلب ؟
انا افتكرته أكلي انا وأكلته ..
وصرخ القاضي وهو في أشد الغضب اكلت اكل الكلب يا نكد ؟
والمسكين بياكل ايش
نكد : قائلا ولا شيء
قال القاضي : يعني مات من الجوع ؟
قال نكد : أظن كده .. بس المهم لا تكون زعلان يا سيدنا القاضي
القاضي : رد وهو في أشد القهر : أنا .. لا .. وأزعل علي كلب

وتاني يوم طلب القاضي انه ياكل لحمه مسلوقه .. وراح نكد يدور لحمه في السوق
كله ما لقي ..
رجع للقاضي وقال له : يا عمي ماني لاقي لحمه في السوق
القاضي : اتصرف ماهو شغلي
خرج الصبي علي السوق وصار يدور تاني لحد ما تعب واحتار في أمره وأخيرا
لقي في وجهه جثة الكلب الميت شاله وراح سلق لحمه وحضره للأكل .. ولما رجع
القاضي علي البيت لقي الاكل جاهز فأكل وشبع وبعدين
سأل الصبي : يــا واد انت ما قلت مافي لحمه في السوق اليوم ..
فين لقيتها بعدين يا كداب ؟
قال نكد : والله يا عمي ما لقيت لحمه في السوق .. انا لقيت كلبك الميت
في الجنينه قلت نستفيد منه فطبخت لك هوه
القاضي : يخص عليك .. انت تبغي تموتني .. وقام علي الحمام يحاول يطلع
اللي اكله ..
قال الصبي : ها يا عمي .. انت زعلت ؟
القاضي : لا أبـــدا .. بس بعد كده انتبه ولا تعمل عمايل زي كده ..
وبلعها القاضي وهو يغلي من الصبي بس كان خايف يظهر غضبه ويخسر خشمه

وفي يوم تاني والقاضي عنده ضيوف مهمين في المجلس سمع صوت جاريته
بتغني وهي بتطحن الحب .. فصار محرج قدام ضيوفه الكبار وقام زهم علي نــكد

القاضي لنكد : قال له اطلع لانصاف وقول لها تسكت من الغنا لأنها ازعجت ضيوفي
وكمان توقف المطحنه دي شويه من فوق روسنا ..

طلع نكد للجاريه وقال لها : يا أنصاف يقول سيدي القاضي قوي الطحين
كمان أرفعي صوتك بالغنا عشان ضيوفه منطربين منك ..

صارت الجارية مبسوطه بنفسها وتغني باعلي صوتها وتدقدق بالمطحنه بكل قوتها
وزهم القاضي نكد مرة ثانيه
وقال له : اطلع للجارية تاني مره وقول لها تنكتم بالمره ما احنا سامعين نفسنا ولا تدق
المطحنه الا لما يخرجوا الضيوف ..
طلع نكد للجاريه وقال لها : بارك الله فيك يا إنصاف .. الضيوف في غاية الانبساط منك ..
زودي كمان قد ما تقدري ,
صارت الجارية تطبل وترقص وتعمل شيء لا خير فيه .
زهم القاضي علي نكد للمرة الثالثة وقال له : اطلع أضرب هادي المجنونه وأكتم صوتها
طلع نكد علي فوق لقي في طر يقه ساطور شاله ونزل به علي راس الجاريه
وجـــاب خـــــبرهــــا

بعد ما انتهي القاضي من اجتماعه بضيوفه المهمين طلع علي فوق يشوف ايش الحكايه
وصار ينادي علي الجاريه .. ينادي .. ما ترد . ودور عليها لحد ما لقاها يا عيني مرميه
علي الارض ودمها سايل .. جري وهو غضبان علي الصبي نكد
يساله عن اللي جري .
قال نكد : يا عمي انا ما كان ممكن أعمل غير كده .. انصاف ماكانت راضيه تسكت
وخفت انك تزعل مني يا سيدي القاضي
رد القاضي .. وهو بيغلي : لا .. لا .. انا ما زعلت ولا شيء .. بس انا شايل هم
كيف نخلص من هادي المصيبه .. انا ما ابغي الناس تقول بيت القاضي
فيه قتل ومقتول ..
رد نكد : بسيطه احنا نستني اخر الليل ولما يناموا الناس وفي الظلام نتعاون انا وانت
ومراتك وندفنها في البحر .. بس ما تكون زعلان مني يا عمي ..
رد القاضي : لا .. لا ... مافي حاجة تزعل ابــــدا .. فين ؟

وفي الليل خرجوا وهم شايلين الجاريه وفرشوا عند البحر لكن شافوا صيادين
واقفين قريب منهم فما عرفوا يرموا الجثه قدامهم ..
فقال الصبي نكد : انت أكيد تعبان يا عني .. ليش ماتنام شويه انت ومراتك
وانا ار اقب الشط لحد ما يفضي وأصحيكم في الساعة المناسبه
وافق القاضي وراح ينام هو ومراته ..
وبعد ما أتاكد نكد من نومهم راح بشويش وشال مراة القاضي ورماها في البحر
وحط جثة الجاريه جبنب القاضي ونـــام
وفي الصباح صحي القاضي مفزوع ولقي الجاريه جنبه ومراته ماهي موجوده
زهم القاضي علي الصبي نكد يصحيه ويقول فين مراتي ؟
وليش ما صحيتني في الموعد المناسب ؟

قال الصبي نكد ببرود : يا عمي انا ما حبيت أزعجك وانا شايفك نايم مرتاح
والظاهر مع النوم ما أنتبهت انا شلت مين ورميت مين ..
قال القاضي : لا حول ولا قوة الا بالله وصل بك الحال انك ترمي مراتي في البحر
انت مجنون ؟
قال نكد : طيب انا اعمل ايش ؟ النوم من جهة والظلام من جهه .ز انا ماكنت شايف شي
,, بس ما تكون زعلت يا سيدنا القاضي ؟
رد القاضي وهو مطرشق من الغيظ : لا .. لا .. وأزعل من ايش ؟ انت عملت شي يزعل
.. كله قسمة ونصيب .. ورموا الجاريه في البحر

بعد ايام قال الصبي نكد للقاضي : يا عمي انت ليش زعلا ن ومهموم ؟
قال القاضي : ماني زعلان منك .. انا حزين علي مراتي
قال الصبي نكد : ولا تزعل ولا يكون خاطرك الا زي العسل ..
ايش رأيك أنا اجوزك واحدة تعوضك عنها خير وتسر قلبك وخاطرك
قال القاضي : ياللا علي الله ثم عليك

راح نكد بيت ناس واتقدم وطلب يد بنتهم للقاضي , وفرحوا الناس بالعريس اللي يشرفهم
نسبه ومهنته المحترمه ووافقوا علي طول .ز وشرط الصبي نكد . ان الملكة والدخله في ليله واحده وفي اليوم المحدد اتفق مع اهل العروسه ان القاضي لا زال حزين علي مراته الاولي
وما يبغي تكاليف افراح ولا اكل كتير .ز اما اكله هو الخاص فما أحد يحضره غيره هو نفسه
أي الصبي نكد) لان القاضي ماشي علي نظام حميه وما ياكل شيء غير البليله ..
وطلبهم حمص وكيلو ملح .ز وسلق الحمص وحضر البليله وكبسها ملح
ولما حضر القاضي لبيت العروسه وانهي اجراءات الزواج انتظر العشا
وهو ميت من الجوع .ز ودخل اكل القاضي في صينية خاصه وجلس ياكل
من البليله لقمه ويشرب عليها كاسة مويه . . ياكل لقمة تانيه ويرمي فوقها كاسه مويه علي كده
الي ان شبع ..
وهمس بشويش لصبيه نكد وقال : ايش بهم هادول الناس ؟ هادا اكل يليق بقاضي في
ليلة دخلته ؟
قال نكد : لا والله .ز حرام الجماعة كانوا راح يقوموا بالواجب لكن انا طلبت لك البليله
وطبختها بنفسي بنفسي ..
قال القاضي : ايش دخلك ؟ مين سمح لك تطلب هادا الطلب الغريب ؟
الله لا يسامحك
قال نكد : بس انا ابغي اعرف حاجة واحدة يا سيدي القاضي .. انت زعلا ن مني .ز
قال القاضي وهو بيكح : لا .. طبعا ماني زعلان .. بس انت حرقت لي قلبي من كتر الملح
الله يحرق قلبك ..
وسكت القاضي علي مضض وقضي ليلة فرحه مابين الفراش والحمام من آلام البطن
واتنغصت عليه ليله العمر


وبعد اسبوع من الجواز سمع نكد بالصدفه
صوت القاضي بيقول لمراته الجديدة : انا ماعاد قادر اتحمل هادا النكد اللئم .. طفح بي الكيل
وهو مستلمني بالمصائب واحدة ورا التانيه .. وبصراحة أنا خايف عليك
من أذيته .. وفكرت مافيش طريقه أخلص بها منه غير اني ارحل من هادي البلد وأهرب
منه للابد ..
قالت الحرمة : أسيب اهلي وأروح
قال القاضي : اقولك حياتك في خطر تقولي أهلي ؟ احنا نحضر نفسنا للرحيل بكره في الفجر
ونكد لسه نايم حتي ما يحس بخروجنا من البيت
وضحك نكد من ورا الباب وقال في نفسه : تروح مني فين يا سيدنا القاضي ؟
انا وراك وراك والزمن طويل .


وقبل طلوع الفجر راح نكد واندس داخل كيس العفش اللي كان القاضي محضره عند الباب
وقام القاضي ومراته عند الفجر واخدوا عفشهم وأتوكلوا علي الله وخرجوا من البيت ..
وصاروا يمشوا ويجروا في الكيس وراهم والقاضي يقول انت ايش حطيت في الكيس يا حرمه
حجار ؟ قد كده تشيلي عفش ؟ ويمشوا ويمشوا الي ان تعبت مراته من كترة المشي
وطلبت توقف شويه ترتاح والقاضي يقول : انا ما راح ارتاح الا لما أبعد عن نكد المصيبه
واستمروا يمشوا لحد ما بعدوا عن البلد وظن القاضي ان المسافه اللي قطعوها كافيه تبعدهم عن نكد... ولما وافق يقعد يرتاح فرش القاضي الارض واتمدد هو ومراته وهم بيناهجوا
من التعب..وما انتبه القاضي الا علي صوت يعرفه ويكره سماعه بيقول :
ياسيدي القاضي تبغاني احضر لكم فطور ؟ امديكم جيعانين ..
وقام القاضي وهو مفزوع وما صدق عينه لما شاف نكد قدامه بيضحك في وجهه في منتهي البرود وصرخ
قال : انت ايش جابك هنا
قال نكد .. :اندسيت في الكيس هادا لما عرفت انكم مسافرين .. قلت جايز تحتاجوا شيء
وانا دايما في الخدمه ..
ووقف القاضي علي حيله وصار يزعق من غيظه ..
وقال نكد بسرعه : خير يا عمي انت زعلان مني ولا ايش ؟
رد القاضي وهو في منتهي الغضب : ايوه زعلان .. زعلان .. زعلان
قال نكد : هادا اللي انا ابغاه .. انك تزعل واقطع لك خشمك
قال القاضي : خذ خشمي وانقلع من وجهي جبت لي البلا من يوم ما شفتك
وقطع نكد خشم القاضي من جذوره وتركه ودمه يسيل ورجع لاخوه
وقال له : هيا يا اخويا .. جبت لك خشم القاضي المفتري بعد ما عذبته عذاب
الزيت في القنديل